Lo que fizo la borona...

Orbayu

2010-05-12T07:42:00.000-07:00

Vosotros de xuru que sabéis más que yo, (tamién cuento con que seáis más vieyos). Pero dame igual, de xuru que vosotros sois d’esos amantes del mes d’agostu y yo soi un guerrilleru de l’orbayu que nagua por davos d’hosties pa que sepáis lo bien que sabe’l tastu de la tierra moyada y de les babes de los llimiagos cuando vos suban pola cara.

La dignidá d'un pueblu

2010-05-04T07:24:00.001-07:00

Domingos

2010-04-11T16:16:00.000-07:00

Los domingos de nueche son igual que los caberos díes d'avientu, cuando faes propósitos pal añu que vien o pa la selmana qu'entra. Echase primero pa nun tener tantu sueñu nes mañanes, estudiar más, sonreír más...

Jet Lag

2010-04-07T07:29:00.000-07:00

Lo que los inglés-falantes llamen “jet lag” cuido que nun dexa de ser una suma de ganes de dormir, ganes de llorar y ganes d’echar el polvu na habitación d’hotel que la hora de salida del vuelu nun te dexo echar.

Restallones

2010-03-14T08:00:00.000-07:00

Daime una pistola restallones, quiero tornar a sentime un nenu apuntando con un gramu pólvora a la pescal de detrás de casa.

Premiu Kreativu

2010-03-08T14:57:00.000-08:00

Convidame Dígotelo yo a que vos cuente siete coses sobre la mio persona y convidar a otros siete a facer lo mesmo con esti “Premiu Kreativu” , nun soi yo de falar muncho de mí pero la ocasión merezlo.

1. Nací va 21 serondes n’un pueblu d’un conceyu de la cuenca minera que nadie sabe bien onde entama y onde acaba porque los paisanos del mio pueblu siempre fueron muy bravos y nunca tuvieron d’alcuerdu con el llugar onde ponien les señales del pueblu y nunca duró una más d’una nueche (misteriosamente apaecíen nel contenedor de la basoria), polo tanto les llendes del mio pueblu siempre fueron un tema de gran controversia y pol que si la cosa se ponía tensa igual llevabes un recuerdu pa casa por listu.

2. Vivo en la cuenca, estudio pa la mariña, tengo familia pal occidente, toco pal oriente prósimu y tengo una sorrisa tovía más pal oriente. Polo tanto y teniendo en cuenta que nun tengo coche, el tiempu que paso en bus y les perres que doi a ALSA podeis imaxinavosles y por esto y pola economía soi un fiel defensor de les ediciones de bolsillu de los llibros.

3. Esti blog entamó gracies a la vara que me dio otru blogueru llangreanu que depués de pasar mediu día pinchando culos dedica el otru mediu a restolar pela rede. Dexelu de llau un par de meses, siendo sinceros porque nun tengo ni puta idea d’informática y nun sabía camudar un par de coses de la plantilla (soi un pocu vagu, pero polo menos reconozolo), pero gracies al gabitu que m’echo una moza que si sabe d’ello echo a andar otra vegada esti proyectu de blogue o cosa rara.

4. En materia de gustos culturales soi aficionau a la novela de toa triba d’estilos y a la poesía en mui pequeñes dosis. Pa la música soi un repunante y probablemente un friki que si vos fala de los grupos que conoz nun sepáis nin tan siquiera d’onde son. Casi nun veo la televisión pero en cambiu paso bastante tiempu colgáu d'internet.

5. Depués de dedicar tola mocedá a estudiar más tirando pola rama de lletres, diome la venada de tirar por coses de debuxu técnicu (lo mio ye too asina). La mio vida ye como un tobogán d’un parque infantil por cuenta de coses como esta, subir,baxar, cambiar, creer que nun se pue, algamalo…

6. La comida que más me presta del día ye l’almuerzu, pero como siempre se me peguen les sábanes siempre tengo que salir medio corriendo col bocáu na boca. Por eso los sábados y los domingos son sagraos. El brunch inventelu yo, conste n’acta.

7. Llevo dende’l primer puntu dándome cuenta lo abegoso que se me fae falavos de mí personalmente.

Nun voi premiar a naide n'especial a facer esti Premiu Kreativu (más que nada porque paezme que me sigue bien poca xente), sois llibres de lleeme y facelo vosotros mesmos y d'esparder esta iniciativa al vuesu blog.

Los pegollos de la sorrisa

2010-03-07T07:47:00.000-08:00

Él pidio-y un besu que-y diese fuerces pa tola selmana, ella dio-y dos, ún en cada estremu de la sorrisa, pa sostenela los siete díes como los pegollos d'un horru.

Caleidoscopios y tangues

2010-02-17T07:25:00.000-08:00

Hai díes nos que veo retorcese el pasau, el presente y el futuru n'un caleidoscopiu. Too mecío a la vez y too retorcío, como la vida mesma.

Pero como tolos nenos saben, los caleidoscopios namás valen pa un güeyu y abriendo el que tenía pesllau veíala a ella en tanga, y que vos voi decir... yera muncho más guapo.

Vivir, non sobrevivir

2010-01-31T07:48:00.000-08:00

Los domingos azules del inviernu nun presten porque nun van acordes col tiempu y entovía menos al ser domingu.

Son raros, pesaos y gafos, pero habrá qu'abrir una cerveza pa escuchar a Cesk cantar (y eso puede que me faiga el domingu menos pesau) porque caro... tratase de vivir, non de sobrevivir.

Tener un blogue

2010-01-26T13:57:00.000-08:00

Tener un blogue ye asumir que poca xente te va lleer, por exemplu porque pa ellos nun importa un res lo que tú tengas que dicir.

De toes formes, siempre me prestaron les causes "perdíes" con ciertu aire de romanticismu.

Barros, la mi caleya y yo.

2010-01-21T12:30:00.000-08:00

Él siempre tien qu'esplicar onde queda'l su pueblu, asume que poca xente va considerar que la caleya onde vive ye eso, una caleya y non una cai, tendrá qu'esplicar doscientes mil vegaes porque se pon gafu cola calor o nun sabrá que decir cuando-y digan que porque fala asina.

Pero ye too avezase a ello.

II

2010-01-21T08:56:00.000-08:00

Acordase por segunda vegada desde qu'abrí esti blog de que había quedau n'una esquina garrando polvu. Ye buen día pa volver falavos a los que podais cayer equí por curiosidá o por azar.

Prosimamente más y meyor.

2009-06-02T15:19:00.000-07:00

Los domingos son la cosa más literaria que conozo depués de les muyeres. Tolos escritores falen de muyeres rubies, rizoses, morenes, de pelu lisu, con gafes, en tacones, en playeros, en camiseta o desnudes. Y tenía qu'haber más escritores que falaren de domingos, del sable la playa, del fríu, de la llucha de dos cuerpos, de películes a medies o de cafés y cerveces. A lo meyor tú qu'entres equi a lleer esto qu'escribo el primer miércoles de xunu a les 00:24 de la nueche sabes lo que ye ser domingueru sin acompañante, y prestabate que yo falare d'ello, pero el títulu d'escritor quedame enforma grande...

Tornar

2009-05-13T04:44:00.000-07:00

Yo tenía un blogue.... d'eso me di cuenta l'otru día mientres andaba pel tuenti, pel facebook, pel fotolog... mil coses qu'al fin y al cabu valen pa "casi" lo mesmo. Diome por escribir otra entrada n'esti "lo que fizo la borona..." y podría falavos de crisis, pero como soi de la cuenca equí llevamos 20 años en crisis y somos el proyectu pilotu de crisis. Podría falavos de gripe porcina, pero equí tovía nun llego y entós yo sigo pensando en comer un pocu andoya acompañao d'un pocu de quesu afuega'l pitu roxu que fae una perbona combinación. O tamién de la canción que venia ayer escuchando nel tren camín de casa y que en parte fizome acordame de varies coses, entre elles que yo un día abrí un blogue.... http://www.goear.com/listen/473382f/guten-og-mannen-Fribo

Ensaio.org

2009-02-10T12:28:00.000-08:00

Dende entamos del mes d'agostu furrula en Galicia el portal d'internet http://www.ensaio.org/ destinau a ser un puntu común d'aconceyamientu pa los grupos y músicos galegos na rede. Esta páxina web dende'l so primer día ta distribuiu en tres espacios perimportantes, por un lláu, un sitiu onde dar a coñocer a los grupos que van surdiendo nel país, por otru y un aspectu cimeru que yo señalaría como mui positivu tola documentación ya información de la red de locales d'ensayu que cualquier grupu o músicu pue utilizar y a la fin otru apartau qu'algama dende noticies a concursos. Ye bien cenciello de furrular n'esta páxina, cada grupu crea la so páxina dentro del portal que-y sirve pa dar a conocer les sus actividaes y permite-yos conocer a otros mozos que o bien faen lo mesmo qu'ellos o lo faen na mesma ciudá/pueblu. Perinteresante iniciativa del gobiernu gallegu qu'además decidió aumentar la red de llocales d'ensayu viendo l'espoxigue d'esta iniciativa tan guapa. Esperemos que vaya too p'alantre y que muncha xente mozo y non tan mozo lo puea esfrutar

N'asturianu??

2009-01-30T07:09:00.000-08:00

Y porque facer un blogue n'asturianu? que xacíu tien facer daqué asina n'un momentu nel que l'inglés ye una llingua universal y los amantes del castellán vuelquense en firmar "manifiestos por la lengua común"?

Tien el xacíu de caltener una llingua viva, les llingües que se pierden son una pérdida enforma grande de recuperar pol so valir históricu y de comunicación social pa los sos falantes (por pocos que seyan...). Les llingües caltienense col usu en toles estayes de la vida, y como non, tamién n'interné. Yo ñaci no que yo considero Asturies, de má con orixen nel conceyu Valdés y pá con orixen nel conceyu Llangréu, polo tanto sientome obligau a defender lo que yá falaron tolos mios antepasaos y anque nun seya oficial nel país, na mio casa sí, y la mio casa tamién ye esti blogue nel que tais convidaos a pasar a charrar y a tomar daqué si se tercia.

Living in la cuenca

2009-01-27T12:58:00.000-08:00

Anque nun lo paeza, esto ye totalmente real y atopelo el domingu de la que tornaba pa mio casa. Triste, pero cierto...

La Primera na frente

2009-01-21T11:34:00.000-08:00

Ñaz esti blogue col nome de "Lo que fizo la borona..." una gran frase d'una persona tan sabia como la güela d'esti qu'escribe equí que val pa toa esa triba de coses inesplicables a les que naide ye quien a topar xacíu.

Allá va y que vos preste!